बुलबुल ची रोजनिशी ५
कालच्या रोमांचक अनुभवाची नशा एवढी होती की आज संध्याकाळपर्यंत घर जवळजवळ पूर्ण बांधून पण झालं. आमचं घर ना 1 BHC … आहे. म्हणजे ” एक बुलबुल (फॅमिली) होल्डिंग कपॅसिटी” आहे. मस्त अर्धगोलाकार आहे… आणि अख्खं घर कव्हर्ड आहे. आणि ही म्हणाली की आपल्या पिल्लांना नक्की पुरून उरेल.
आणखी एक गंमत सांगण्यासारखी आहे. तसं तर घर all spice च्या फांदीवरच आहे आणि बिबुशेटने काहितरी “पोरांच्या इम्युनिटी साठी पुरक आहे” असं पण सांगितलं होतं. पण हिची दूरदृष्टी बघा….. म्हणाली शेजारच्या काकूंनी फोडणी घातली की इथे आपल्याला ठसका लागतो तर आपल्या पोरांचं काय ? कुठूनतरी शोधुन एक वाळलेली वेगळीच दिसणारी काडी आणून घरट्याला खोचून ठेवली. मी म्हटलं हे काय ? तर म्हणाली तुळशीची मंजिरी आहे. खोकल्यावर रामबाण ! तुम्हाला सांगतो आमच्या हिचं संसाराचं ज्ञान वाखाणण्याजोगं आहे.
असो. तर आमचं घर फक्त तीन दिवसातच बांधून झालं. पण मी पाहिलंय शेजारचे कुलकर्णी तीन वर्ष घर बांधत होते….. मला एक प्रश्न पडतो की माणसं आपल्या एक आणि दोन पिल्लांसाठी एव्हडी मोठ्ठी घरं कशासाठी बांधतात ?
बुलबुल
दिनांक ३ एप्रिल २०२२.
K Anil Roy Speaks 